Lənkəranda 60 yaşlı kişi yenidən əməliyyat olunsa da, həkimlərin səylərinə baxmayaraq ölüb.
Bu barədə Cenublu.az-ın sorğusuna cavab olaraq TƏBİB-dən məlumat verilib.
Bildirilib ki, Lənkəran şəhər sakini, 1965-ci il təvəllüdlü Şiyavuş Fərəculla oğlu Rzayevin vəziyyəti əməliyyatdan sonra qəflətən pisləşib:
"Bu səbəbdən noyabrın 1-də yenidən əməliyyata alınıb. Lakin bütün reanimasiya tədbirlərinə və həkimlərin çoxsaylı səylərinə baxmayaraq ölüm faktı qeydə alınıb".
Vurğulanıb ki, oktyabrın 29-da ona sol tərəfli boğulmuş iri həcmli qasıq yırtığı diaqnozu təyin edilib, müvafiq tibbi müayinələrdən keçirildikdən sonra təcili qaydada hospitalizasiya olunaraq əməliyyat blokuna alınıb. Cərrahi müdaxilədən sonra pasiyentin vəziyyəti əməliyyata adekvat qiymətləndirilib və müsbət dinamika müşahidə edilib.
Lakin noyabrın 1-də xəstənin vəziyyəti qəflətən pisləşdiyi üçün yenidən cərrahi əməliyyata alınıb və xəstəyə sol tərəfli hemikolektomiya, stomanın qoyulması proseduru icra edilib.
Əməliyyatdan sonra Reanimasiya şöbəsinə yerləşdirilən pasiyentin aparılan bütün reanimasiya tədbirlərinə və həkimlərin çoxsaylı səylərinə baxmayaraq noyabrın 4-ü saat 07:30 radələrində bioloji ölüm faktı qeydə alınıb. Meyit məhkəmə-tibbi ekspertizası aparılması üçün müvafiq qaydada aidiyyəti üzrə təhvil verilib.
12:08
Lənkəranda əməliyyatdan sonra xəstə dünyasını dəyişib.
Cenublu.az xəbər verir ki, oktyabrın 28-də Lənkəran Rayon Mərkəzi Xəstəxanasına yırtıq diaqnozu ilə müraciət edən Lənkəran şəhər sakini, 65 yaşlı Şiyavuş Rzayev əməliyyat olunub.
Xəstənin həyat yoldaşı Azadə Rzayevanın iddiasına görə, əməliyyatdan sonra Ş.Rzayevin vəziyyəti pisləşib. O bildirir ki, xəstənin durumu əməliyyatı aparan həkimin səhlənkarlığı nəticəsində ağırlaşıb:
“Əməliyyatdan sonra vəziyyəti yaxşı olmadı. Bizə dedilər ki, bağırsağı zədələnib, buna görə qarnı şişib və zəhərlənmə baş verib. Sonradan digər həkimlər ona kömək etməyə çalışdı və yenidən əməliyyat olundu, amma gec oldu.”
A.Rzayeva iddia edir ki, hadisədən sonra əməliyyatı aparan həkimlə əlaqə saxlaya bilmirlər.
Məlumata görə, meyit daxili və xarici müayinə üçün Məhkəmə Tibbi Ekspertiza və Patoloji Anatomiya Birliyinin Lənkəran zonası şöbəsinə göndərilib.
Faktla bağlı araşdırma aparılır.
