Lənkəran şəhərinin əsas yollarından biri olan Heydər Əliyev prospektində son vaxtlar müşahidə olunan natəmizlik və abadlıq işlərindəki gecikmələr sakinlərin narazılığına səbəb olub.
Cenublu.az-a sakinlərdən daxil olan şikayətə görə, prospekt boyunca yollarda və səkilərdə toplanmış tullantılar, biçilməmiş otlar, zibillərin vaxtında daşınmaması və ümumi təmizlik işlərinin zəif aparılması ərazinin görünüşünü xeyli korlayır. Sakinlər bu vəziyyətin prospektin daşıdığı simvolik və ictimai əhəmiyyətinə uyğun olmadığını bildirirlər.
Şikayətçilər qeyd edirlər ki, kommunal xidmətlər üçün aylıq ödənişlər vaxtında yığılır, lakin bunun müqabilində lazımi xidmət göstərilmir. Ərazidə üfunət və antisanitar şəraitin yaranması gündəlik həyat üçün çətinliklər yaradır.
Sakinlər aidiyyəti qurumların məsələ ilə ciddi şəkildə maraqlanmasını, nəzarətin gücləndirilməsini və Heydər Əliyev prospektində təmizlik və abadlıq işlərinin tezliklə bərpa olunmasını tələb edirlər.
