Lənkəranda ağır qəza nəticəsində avtomobildə sıxılıb qalan sürücünü Fövqəladə Hallar Nazirliyinin (FHN) əməkdaşları çıxarıb.
Cenublu.az xəbər verir ki, hadisə gecə saat 3 radələrində şəhərin "Qalayçılar" adlanan ərazisində qeydə alınıb. 1987-ci il təvəllüdlü Vüsal Azad oğlu Abıyev idarə etdiyi "QazEl" markalı yük avtomobili ilə hərəkətdə olarkən yolda hərəkətsiz dayanan "KamAZ" markalı yük avtomobilinə çırpılıb. Ağır xəsarət alan sürücü V.Abıyev nəqliyyat vasitəsində sıxılaraq qalıb. Hadisə yerinə FHN-nin xüsusi riskli xilasetmə qüvvələri cəlb olunub. Xüsusi avadanlıqlar vasitəsilə sürücü nəqliyyat vasitəsindən çıxarılaraq aidiyyəti üzrə təhvil verilib.
Müxtəlif dərəcəli bədən xəsarətləri alan sürücü Lənkəran Rayon Mərkəzi Xəstəxanasına hospitalizasiya olunub və vəziyyətinə uyğun olaraq reanimasiya şöbəsinə yerləşdirilib. Hazırda xəstənin vəziyyəti ağır olaraq qalır.
Faktla bağlı araşdırma aparılır.
