Lənkəran rayonunun Şağlaküçə kəndində Qurbanzadə Ayxan Fariz oğlunun xatirəsinə inşa edilən bulaq kompleksinin açılışı olub. Bu haqda məlumatı Cenublu.az bu gün, 25 iyul tarixində Unikal.org-a istinadən verir.
Bulağın açılış lentini Lənkəran ŞİH-nin başçısı Taleh Qaraşov şəhidin atası Qurbanov Fariz ilə birgə kəsib.
Qeyd edək ki, Ayxan Qurbanzadə 25 iyul 1998-ci ildə Lənkəran rayonunun Şağlaküçə kəndində Birinci Qarabağ müharibəsi qazisi və 2-ci qrup Qarabağ müharibəsi əlili Fariz Qurbanovun və Yunsirə Qurbanovanın ailəsində anadan olub. Vətən müharibəsində atıcı olaraq iştirak edən Ayxan Xocavəndin və Füzulinin azadlığı uğrunda gedən döyüşlərdə vuruşub. 25 oktyabr 2020-ci ildə Füzuli-Hadrut istiqamətində döyüş tapşırığının yerinə yetirilməsi zamanı şəhid olub. Lənkəran rayonunda dəfn olunub.
Ölümündən sonra “Vətən uğrunda”, “Füzulinin azad olunmasına görə”, “Cəsur döyüşçü” və “Şuşanın azad olunmasına görə” medalları ilə təltif olunub.
