Lənkəran rayonunda M.Qarayev adına Zövlə kənd orta məktəbində direktor müavini tərəfindən şagirdə və xadiməyə zorakılıq edilməsi ilə bağlı görüntülər yayılıb.
Daxili İşlər Nazirliyinin Mətbuat Xidmətinin Lənkəran regional qrupundan Cenublu.az-a bildirilib ki, hadisə bu ilin mart ayında baş verib. Müraciətlər əsasında Lənkəran Şəhər Rayon Polis Şöbəsində araşdırma aparılıb, ekspertizalar təyin olunub və digər prosessual hərəkətlər görülüb. Tərəflərin şikayət və tələbinin olmaması, həmçinin tibbi ekspertizanın rəyinə əsasən cinayət işinin başlanmasının rədd edilməsi barədə qərar qəbul edilib.
Məsələ ilə bağlı Lənkəran-Astara Regional Təhsil İdarəsi də açıqlama yayıb. Qurumdan bildirilib ki, 11 mart 2025-ci il tarixində qeyd edilən iddia əsasında araşdırma aparılıb. Təlim-tədris prosesində belə halların yolverilməzliyi nəzərə alınaraq, 17 aprel 2025-ci ildə məktəbin məktəbdənkənar və sinifdənxaric tərbiyə işləri üzrə təşkilatçısı Qurban Sadıqovla bağlanmış əmək müqaviləsinə xitam verilib.
Qeyd olunub ki, təhsilverənlərin etik davranış qaydalarına əməl etməsi, şagirdlərin təhlükəsizliyi və psixoloji durumunun qorunması daim diqqət mərkəzində saxlanılır və bu istiqamətdə mütəmadi olaraq maarifləndirmə tədbirləri həyata keçirilir.
