Lənkəran ŞRPŞ əməkdaşlarının keçirdikləri əməliyyat-axtarış tədbirləri nəticəsində 11 kiloqramdan artıq müxtəlif növ narkotik vasitələr və silah-sursat aşkarlanıb. Bu haqda məlumatı bu gün, 17 yanvar tarixində Report verib.
Belə ki, rayon sakini Rizvan Əkbərov narkotik vasitə heroini satarkən saxlanılıb. Ona məxsus həyətdəki qarajda saxlanılan “VAZ 2106” markalı avtomobilin mühərrik hissəsində 6 kiloqramdan artıq heroin, 1 kiloqram 250 qram metamfetamin, 2 kiloqrama yaxın qurudulmuş marixuana və 1 ədəd tərəzi aşkarlanaraq götürülüb.
Həmçinin, həmin şəxsin qohumuna məxsus yaşayış evində silah-sursat gizlədildiyi müəyyən edilib. Evdən 2 ədəd “Kalaşnikov” markalı avtomat, 3 ədəd sandıqça və 12 ədəd patron, həmçinin üzərinə snayper tüfənginə məxsus uzaq görmə cihazı quraşdırılmış 1 ədəd karabin odlu silahı aşkarlanıb. R.Əkbərovun həmin narkotik vasitə və silahları xarici vətəndaşdan əldə etdiyi müəyyən edilib.
Daha bir əməliyyat-axtarış tədbiri nəticəsində rayon sakinləri Orxan Ağazadə və Riyad Əskərov saxlanılıblar. Onlardan hazır bükümlərdə heroin aşkarlanıb. Onların, narkotik vasitəni Liman şəhər sakini Şahin Bağırovdan əldə etdikləri müəyyən edilib. Keçirilən baxış zamanı Ş.Bağırovun üzərindən və idarə etdiyi “Mercedes” markalı avtomobilin yük yerindən 2 kiloqram 174 qram heroin aşkarlanıb. Həmin şəxsin narkotik vasitəni xarici ölkə vətəndaşı vasitəsilə əldə etdiyi müəyyən edilib.
Lənkəran ŞRPŞ-nin əməkdaşlarının keçirdikləri digər əməliyyat-axtarış tədbirləri nəticəsində rayon sakinləri Əşrəf Səfərov və İqbal Abbasov da saxlanılıblar. Onların üzərindən heroin və elektron tərəzilər aşkarlanaraq götürülüb.
Faktlarla bağlı araşdırma aparılır.
