Lənkəran rayonu Girdəni kənd tam orta məktəbinin binasının təmirə ehtiyacı var. Bu haqda məlumatı bu gün, 6 yanvar tarixində Cenublu.az verir.
Belə ki, kəndin köhnə məktəbinin binası artıq tamamən sıradan çıxıb. Valideynlərin sözlərinə görə, təqribi 17-18 il öncə kənd üçün Heydər Əliyev Fondu hesabına yeni məktəb inşa olunmuşdur. Lakin bu müddət ərzində məktəbə yetərincə baxılmadığından, artıq o binanın təmirə ehtiyacı var.
"Kəndimizdə təqribi 600 nəfər şagird var. Amma məktəbimiz 200-250 nəfər şagird tutur. Bəs qalan şagirdlərin aqibəti necə olacaq? Valideynlər məcburən qışın soyuğunda uşaqları qonşu kənd məktəblərinə aparırlar", - deyə sakinlərdən biri deyib.
"Bina nəmişlikdən çökür. Tavanlar tökülür. Fasadı rəngləyirlər, elə bilirlər bununla iş düzəlir. Məktəbin içi baxımsız vəziyyətdədir. Veravul, Vilvan, Cil, Osaküçə kəndlərinin məktəblərinə yeni məktəb binası tikirlər. Amma bizim uşaqlar şəraitsiz məktəbdə oxumalıdırlar", - deyə digər valideyn deyib.
Qeyd edək ki, Cenublu.az daha öncə Kənarmeşə məktəbinin şəraitsizliyindən yazmışdır.
[caption id="attachment_8694" align="alignnone" width="300"]
Foto Cenublu.az[/caption]
Məktəbin köhnə binası
