Bu gün qəhrəman şəhidimiz Murad Mahmud oğlu Hüseynzadənin doğum günüdür. Bu haqda məlumatı Cenublu.az verir.
Murad Mahmud oğlu Hüseynzadə 8 yanvar 1998-ci ildə Lənkəran rayonunun Şağlaser kəndində anadan olub. Orta təhsilini Lənkəran rayon A.Əsədullayev adına Şağlaser kənd ümumi orta məktəbində alıb. Hərbi xidmətini başa vurduqdan sonra, Lənkəran Rayonlararası Narkoloji Xəstəxanasında işləməyə başlayıb.
2016-cı ildə Aprel döyüşlərinin iştirakçısı olan Murad, Vətən müharibəsinə də könüllü olaraq yola düşüb. O, 21 oktyabr Qubadlının Muradxanlı kəndi istiqamətində gedən döyüşlərdə ayağından yaralanıb, lakin hospitala getməkdən imtina edib və döyüşə davam edib. 31 oktyabr Laçın Koridoru istiqamətində gedən döyüşlərdə, Murad şəhidlik zirvəsinə ucalıb. Onun nəşi neytral zonada qaldığından, çıxarılması bir müddət mümkün olmayıb.
Murad Hüseynzadə ölümündən sonra "Cəbrayılın azad olunmasına görə", "Qubadlının azad olunmasına görə" və "Vətən uğrunda" medalları ilə təltif olunub.
