Lənkəran şəhəri şəhid Rövşən Bədəlov adına 9 nömrəli tam orta məktəbinin əsaslı təmirə ehtiyacı var. Bu haqda məlumatı bu gün, 21 yanvar tarixində Cenublu.az verir.
Belə ki, valideynlərin sözlərinə görə, 1-2 dərs otağı çıxmaqla digər siniflər təmir olunmalıdır.
"Övladım bu məktəbdə təhsil alır. Sinif otaqlarının döşəməsi dərmə-deşikdir. Uşaqlar bir neçə dəfə məktəbdə siçovul görüblər. İsitmə sistemi yoxdur. Otaqlarda odun peçi var, o da demək olar ki, qızdırmır", - valideynlərdən biri söyləyib.
"Vətən müharibəsində məktəbimizin 3 məzunu şəhid olub. Onların şəkilləri məktəbin girişindən asılıb. Şəhər məktəbidir, lakin təhsil almaq üçün şərait yoxdur. Sinif otaqları soyuq və təmirsizdir, idman zalı yarasız haldadır. Axı nə vaxta kimi bu şəraitdə uşaqlarımız dərs keçəcəklər", - deyə digər valideyn söyləyib.
Qeyd edək ki, məktəb 20 yanvar şəhidi Rövşən Bədəlovun adını daşıyır. Həmçinin, Vətən müharibəsində məktəbin üç məzunu - Həsənağa Abdullazadə, Elnur Talıbov, Mirxəyal Kərimzadə şəhidlik zirvəsinə ucalıblar.
[URIS id=9463]
