Masallı rayon Rüdəkənar kənd sakini Elçin Ağayev iddia edir ki, yeni doğulan körpəsi həkim səhlənkarlığı nəticəsində infeksiyaya yoluxub. O bildirir ki, övladı oktyabrın 1-də Masallı Rayon Mərkəzi Xəstəxanasında dünyaya gəlib, lakin doğuşdan iki gün sonra vəziyyəti pisləşib.
“Uşağım tam sağlam idi, amma indi xəstəxanadadır. Doğuş zamanı həkimlər əlcək taxmadan işləyiblər, küvəz və alətlər dezinfeksiya olunmayıb. Bunların hamısı həyat yoldaşımın gözü qarşısında baş verib,” - deyə o, qafqazinfo.az-a bildirib.
Ata qeyd edir ki, uşağın vəziyyəti pisləşəndə tibb işçiləri gec reaksiya veriblər.
Hazırda körpə Bakıdakı Respublika Pediatriya İnstitutunda müalicə olunur.
TƏBİB məsələ ilə bağlı açıqlama verərək bildirib ki, uşaq mekonial sularda doğulub, stasionar müalicə alıb və vəziyyətinə görə Pediatriya İnstitutuna göndərilib.
Hadisə ilə bağlı araşdırma aparılır.
