Prezident İlham Əliyev yeni təyin olunmuş Masallı rayon İcra Hakimiyyətinin başçısı Araz Əhmədovu, həmçinin Lerik RİH-nin başçısı Əkbər Abbasovu və Göygöl rayonunun icra başçısı Elvin Paşayevi qəbul edib. Bu haqda məlumatı Cenublu.az bu gün, 25 iyul tarixində Apa.az-a istinadən verir.
Qəbul zamanı cənab Prezident bildirib ki, hansısa dövlət məmuru əgər öz vəzifə borcunu şərəflə yerinə yetirmirsə, əlbəttə ki, o, cəzalandırılacaq və cəzalandırılır da.
“Siz Göygöl, Lerik və Masallı rayonlarına icra başçıları vəzifəsinə təyin edilirsiniz. Sizə böyük etimad göstərilir. Əminəm ki, bu etimadı öz işinizlə doğruldacaqsınız” - deyə Prezident bildirib.
Rayonların yeni təyin olunan icra hakimiyyətlərinin başçıları onlara göstərilən böyük etimada görə Prezident İlham Əliyevə minnətdarlıqlarını bildiriblər, bunu doğrultmaq üçün tam məsuliyyətlə çalışacaqlarını və dövlətimizin başçısının tapşırıqlarından irəli gələn məsələləri, üzərilərinə düşən vəzifələri layiqincə icra etmək üçün səylə fəaliyyət göstərəcəklərini bildiriblər.
