Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilən Qaradağ Rayon İcra Hakimiyyəti başçısının müavini Nadir Muradovun əvvəllər də eyni rəhbərlə işlədiyi məlum olub.
Qafqazinfo.az xəbər verir ki, Nadir Muradov indiki Qaradağ RİH başçısı Süleyman Mikayılov Lənkəran şəhərinə rəhbərlik etdiyi dövrdə onun komandasının üzvü olub. O, əvvəlcə Lənkəran Şəhər İcra Hakimiyyəti Aparatında Ərazi və idarəetmə şöbəsinin müdiri, daha sonra isə başçının təhsil, səhiyyə və mədəniyyət məsələləri üzrə müavini vəzifəsində çalışıb.
S. Mikayılov Qaradağa təyin edildikdən sonra N.Muradovu da paytaxta aparıb və onu əvvəlcə şöbə müdiri, daha sonra icra başçısının müavini təyin edib. N.Muradov bu vəzifəni təxminən 10 il icra edib.
Qeyd edək ki, Nadir Muradovla yanaşı Qaradağ RİH-nin digər əməkdaşları da rüşvət alma ittihamı ilə saxlanılıb. Onlara Cinayət Məcəlləsinin 311.3-cü maddəsi ilə ittiham irəli sürülüb. N.Muradov və daha iki şəxs barəsində həbs qətimkan tədbiri seçilib, digər iki şəxs polis nəzarətinə verilib. İstintaq davam edir.
