İmişli rayon sakini Əlikram Baxışov 2024-cü il yanvarın 7-də Qızılkənd kəndində yerləşən bir MMC-yə məxsus obyektin yaxınlığında baş verən insidentlə bağlı məhkəmə qarşısına çıxıb.
Əmlak Məsələləri Dövlət Xidmətinin Beyləqan ərazi şöbəsinin əməkdaşları həmin ərazidə baxış keçirdiyi vaxt, zərərçəkmiş şəxs – Səlim Kərimov prosesi telefonla çəkib. Baxışın görüntülənməsinə etiraz edən Əlikram Baxışov onunla mübahisə edib və fiziki güc tətbiq edərək Səlimin sol əl barmaqlarını burub.
Zərərçəkmişin sol əlinin 4 və 5-ci barmaqları sınıb. Tibbi ekspertiza bu xəsarətləri sağlamlığa yüngül zərərvurma kimi qiymətləndirib.
İmişli Rayon Məhkəməsinin hökmü ilə Əlikram Baxışov 1 100 manat cərimə cəzasına məhkum edilmiş, zərərçəkmişin 2 000 manatlıq mənəvi zərər tələbi təmin olunmamışdı.
Daha sonra iş üzrə apellyasiya iclası Şirvan Apellyasiya Məhkəməsində keçirilib. Hakim Yaşar Həşimovun sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxsin apellyasiya şikayəti təmin edilməyib, zərərçəkmişin müraciəti isə qismən təmin edilib. Əlikram Baxışova 1 il müddətinə islah işləri cəzası verilib, onun aylıq qazancının 10 faizi dövlət nəfinə tutulacaq. Bundan əlavə, o, zərərçəkmişə 300 manat mənəvi zərər ödəməlidir.
Qeyd edək ki, adlar şərtidir.
