“Halay” folklor ansamblının əsası Masallı rayonunun Mahmudavar kəndindən olan Ümbülbanu Cəbiyeva tərəfindən qoyulub. Bacarığı və fitri istedadı ilə o dövrün rayon rəhbərliyinin diqqətini çəkən Ümbülbanu xanım, cəmi 20 yaşında ikən Mahmudavar kənd klubuna rəhbər təyin edilib.
1955-ci ildə Bakı şəhərində keçirilən Gənclərin Ümumrespublika Musiqi Festivalından qayıdan Ümbülbanu talış qızlarından ibarət kiçik bir folklor qrupu təşkil edir və ilk dəfə “Lo, lo” xalq mahnısını səhnələşdirməyə nail olur.
1983-cü ildə kollektiv dövlət tədbirlərindən birində, hazırkı Heydər Əliyev adına sarayda səhnəyə çıxır. Konsertdən sonra Ümummilli Lider Heydər Əliyev kollektivlə şəxsən görüşür və belə deyir:
“Siz nə yaxşı ifa etdiniz! Necə də gözəl kollektiviniz var. Mən bu gün sizin ansamblla bağlı qərar imzalayacağam. Qoy bu gündən sizin ansamblın adı “Halay” Xalq Folklor Kollektivi olsun”
Elə bu görüşdən sonra kollektiv rəsmi dövlət dəstəyi ilə fəaliyyətini daha da genişləndirərək irəliləməyə başlayır.
Qeyd edək ki, “Halay” kollektivi 1972-ci ildə çəkilən “Xatirələr sahili” bədii filmində iştirak edib. Bu ansamblın onlarla çıxışı müxtəlif internet platformalarında yayımlanıb və maraqla qarşılanır.
“Xatirələr sahili” filmindən təqdim etdiyimiz fraqmentdə “Halay” folklor kollektivinin ifasında qədim xalq mahnısı səslənir. Filmdə rol alan aktyorlardan biri, korifey sənətkarlarımızdan Rafiq Əzimov (Vəli) digər məşhur sənətkar Tofiq Mirzəyevə (Aydın) heyranlıqla deyir:
“Bilirsən, nə gözəl oxuyurlar? Belə qədim mahnıları heç yerdə eşidə bilməzsən!”
