Biləsuvar Rayon İcra Hakimiyyətinin həbsdə olan sabiq başçısı Mahir Quliyevin səhhətində ciddi problemlər yaranıb.
Cenublu.az xəbər verir ki, bu barədə məlumatı onun yaxınları veriblər. Qeyd olunur ki, Penitensiar Xidmətin Müalicə Müəssisəsində saxlanılan Mahir Quliyev son günlərdə özünü pis hiss edib və vəziyyətinin kəskin ağırlaşması səbəbilə o, Bakı Sağlamlıq Mərkəzinə təxliyə olunub.
Məlumata görə, sabiq icra başçısının qarın nahiyəsində şiş yaranıb və o, huşsuz vəziyyətə düşüb. Hazırda vəziyyətinin ağır olduğu deyilir.
Xatırladaq ki, Mahir Quliyev həbsdə olarkən ürək əməliyyatı da keçirib.
Biləsuvarın sabiq icra başçısı 29 aprel 2020-ci ildə Dövlət Təhlükəsizliyi Xidməti tərəfindən keçirilən əməliyyat zamanı saxlanılıb. Ona qarşı Cinayət Məcəlləsinin 179-cu (mənimsəmə və israf etmə), 308.1-ci (vəzifə səlahiyyətlərindən sui-istifadə), 311.3.2-ci (təkrar rüşvət alma) və 313-cü (vəzifə saxtakarlığı) maddələri ilə ittiham irəli sürülüb.
Məhkəmənin hökmü ilə Mahir Quliyev 11 il azadlıqdan məhrum edilib.
