İki dəfə Sovet İttifaqı Qəhrəmanı Həzi Aslanovun anım günü ilə əlaqədar tədbir keçirilib. Bu haqda məlumat bu gün, 24 yanvar tarixində Lənkəran Regional Mədəniyyət İdarəsinin rəsmi Facebook səhifəsində paylaşılıb.
Tank qoşunları general-mayoru Həzi Aslanovun ev-muzeyində keçirilən tədbirdə Lənkəran Regional Mədəniyyət İdarəsinin rəisi Şahin Şahbazov, Vətən müharibəsi qaziləri, əsgərlər, kursantlar, zabitlər və digərləri iştirak ediblər. Dünyaca məşhur generalın xatirəsi 1 dəqiqəlik sükutla anılıb.
Generalın həyatı haqda məlumatlar verən direktor Cəmilə Şərifova, muzeyin qapılarının ziyarətçilərin üzünə hər gün açıq olduğunu bildirib. Daha sonra şagirdlərin ifasında qəhrəmanlıq və vətənpərvərlik mövzusunda şeirlər səslənib.
Azərbaycan Vətən Müharibəsi Veteranları İctimai Birliyi tərəfindən Muzeyin direktoru Cəmilə Şərifova başda olmaqla bir neçə fəal mədəniyyət işçilərinə fəxri fərmanlar təqdim olunub.
Tədbirin sonunda iştirakçılar xatirə şəkilləri çəkiliblər.
