Astaranın kəndlərindən birində ər-arvad arasında mübahisə cinayətlə nəticələnib. 1988-ci il təvəllüdlü Natiq Babayev həyat yoldaşı Mətanətlə ailə münaqişəsi zamanı onu yumruq və təpiklə döyərək xəsarət yetirib. Hadisəyə görə ona CM-nin 127.1-ci maddəsi ilə ittiham elan edilib.
Natiq ifadəsində özünü təqsirli bilib və mübahisənin səbəbinin həyat yoldaşının onun başqa qadınla telefon danışığını eşitməsi olduğunu deyib. Hadisə zamanı arvadının sol qolunu da zədələdiyini etiraf edib, peşman olduğunu bildirib.
Zərərçəkmiş Mətanət isə bildirib ki, ərinin başqa qadınlarla münasibətləri səbəbindən mübahisələr tez-tez olur. Həmin gecə ərinin danışığını eşitdiyi üçün aralarında qalmaqal yaranıb və o, müxtəlif nahiyələrinə ağır zərbələr endirib. Qadın aldığı xəsarətlərə görə əməliyyat olunduğunu, müalicəyə 2700 manat xərcləndiyini və mənəvi ziyan çəkdiyini deyib. O, məhkəmədə boşanma iddiası da qaldırıb.
Astara Rayon Məhkəməsi N.Babayevi 1 il müddətinə azadlığın məhdudlaşdırılması cəzasına məhkum edib. Ona elektron nəzarət vasitəsi taxmaq, gecə saat 23:00–06:00 arası evdən çıxmamaq, Astara və Lənkəranı tərk etməmək və yaşayış yerini məhkəmənin icazəsi olmadan dəyişməmək tələbi qoyulub. Qadının mülki iddiası isə baxılmamış saxlanılıb.
