Biləsuvar rayonunun Aşağı Cürəli kəndində baş verən dəhşətli qətllə bağlı məhkəmə prosesi başa çatıb. 32 yaşlı Rüfət Əlizadə 39 yaşlı Vüsal İlhamlını qəsdən öldürməkdə təqsirli bilinib.
Qafqazinfo.az xəbər verir ki, Lənkəran Ağır Cinayətlər Məhkəməsinin hökmü ilə R.Əlizadə 13 il müddətinə azadlıqdan məhrum edilib.
Hadisənin detalları məlum olub. Belə ki, Rüfətin ailəsi bir neçə gün öncə Vüsalın dayısı qızı üçün elçiliyə gedib. Lakin qızın ailəsi bu təklifə “yox” cavabı verib. Bundan sonra Rüfət, qızın onu sevdiyini bildirərək, onu qaçıracağını deyib.
Qızın atası isə bacısı oğlu Vüsaldan Rüfətlə danışaraq bu niyyətdən vaz keçirməsini istəyib. "Finca Azərbaycan" şirkətinin Cəlilabad filialında kredit mütəxəssisi kimi çalışan Vüsal, Rüfətlə telefonla danışıb, lakin aralarında mübahisə yaranıb. Gecə saatlarında baş tutan görüş zamanı tərəflər əlbəyaxa olub, daha sonra Rüfət Vüsalı bıçaqlayaraq qətlə yetirib.
Qeyd edək ki, Vüsal İlhamlı ali təhsilli, iki uşaq atası olub.
