Bu gün Vətən müharibəsi şəhidi Məhəmməd Vəliyevin doğum günüdür.
Məhəmməd Nail oğlu Vəliyev 1996-cı il iyunun 27-də Masallı rayonunun İmanlı kəndində anadan olub.
2014-cü ilin oktyabr ayında çağırışçı kimi hərbi xidmətə yollanıb. Azərbaycan Silahlı Qüvvələrinin “N” saylı hərbi hissəsində xidmət edib. 2016-cı ilin aprel ayında ordu sıralarından tərxis olunub.
Vətən müharibəsi zamanı Füzuli və Qubadlı rayonlarının alınması uğrunda gedən döyüşlərdə düşmənlərə qarşı böyük mərdliklə döyüşərək şəhidlik zirvəsinə ucalıb.
Şəhid Vəliyevin nəşi 23 oktyabr 2020-ci il tarixində Sarıcəfərli kənd qəbiristanlığında torpağa tapşırılıb.
Ölümündən sonra “Vətən uğrunda”, “Cəbrayılın azad olunmasına görə” və “Qubadlının azad olunmasına görə” medalları ilə təltif edilib.
Ailəli olan Məhəmməd Vəliyevin əkiz uşaqları vətənə yadigar qalıb.
