Bu gün kənd təsərrüfatı elmləri doktoru, professor, AMEA-nın Lənkəran Regional Elmi Mərkəzinin direktoru, Beynəlxalq Qafqaz və Azərbaycan Çay Assosiasiyaları İB-nin prezidenti və Azərbaycan Ekologiya və Ətraf Mühitə Nəzarət Mərkəzi İB-nin Lənkəran Cənub Regional departamentinin sədri Fərman Quliyevin doğum günüdür.
Fərman Ağadədə oğlu Quliyev 19 may 1937-ci ildə Lənkəran rayonunun Sütəmurdov kəndində ziyalı ailəsində anadan olub. 1943-1950-ci illərdə Sütəmurdov kəndinin yeddiillik məktəbində, 1950-1954-cü illərdə Lənkəran şəhərinin Subtropik Bitkilər Texnikumunda təhsil alıb. 1954-1959-cu illərdə Azərbaycan Kənd Təsərrüfatı İnstitutunun aqronomluq fakültəsində oxuyub. Əmək fəaliyyətini Azərbaycan Elmi-tədqiqat Bağçılıq və Subtrоpik Bitkilər İnstitutunun Lənkəran Filialında kiçik elmi işçi kimi başlayıb. 1988-ci ildə dosent, 1993-cü ildə professor elmi adlarını alıb.
O, müxtəlif illərdə “Xalqlar Dostluğu” ordeninə, “Əmək Rəşadəti” medalına, “Azərbaycan Respublikasının Əməkdar Aqronomu” fəxri adına, “XXI əsrin tanınmış alimi” Beynəlxalq diplomuna layiq görülüb.
2014-2015-ci illərdə 4 çay sortunu – “Fərmançay”, “Lənkəran”, “Xəzər”, “Fərmançay Çəhrayı”nı Seleksiya Nailiyyətlərinin Sınağı və Mühafizəsi üzrə Dövlət Komissiyasına təqdim edib və 2019-cu ildə patentləşdirib.
Fərman Quliyev 2023-cü ildə noyabrın 7-si vəfat edib.
