Hər il mayın 21-də Beynəlxalq Çay Günü qeyd olunur. Bu gün dünyada çay əkinçiliyinin və çay mədəniyyətinin əhəmiyyətini vurğulamaq məqsədi daşıyır.
Azərbaycanda isə çayın vətəni məhz Cənub zonası – Lənkəran, Astara və Masallı hesab olunur. Bu bölgənin subtropik iqlimi və münbit torpaqları sayəsində burada keyfiyyətli və ləzzətli çay əkilir.
Çay mədəniyyətimiz sadəcə içmək deyil, qonaqpərvərlik, söhbət və sosial münasibətlərin simvoludur. Qonağa çay təklif etmək hörmətin əlaməti, çay süfrəsi isə ailəvi birliyin və söhbətlərin mərkəzidir. Çay bəzən kəklikotu, nanə, yarpız, limon və digər ətirli bitkilərlə də dəmlənir – bu da onun həm ləzzətini artırır, həm də sağlamlıq baxımından faydalı edir.
Azərbaycanda çay bitkisi ilk dəfə 1912-ci ildə Lənkəranda əkilib, ilk çay zavodu isə 1937-ci ildə burada fəaliyyətə başlayıb. Bu hadisə ilə ölkədə çayçılığın əsası qoyulub.
Lənkəranda şəhərin mərkəzindəki nəhəng samovar və armudu stəkan heykəli bölgənin çay mədəniyyətinə olan sevgisinin rəmzi sayılır.
2022-ci ilin dekabrında ölkəmizin və Türkiyənin təqdim etdiyi “Çay mədəniyyəti: kimliyin, qonaqpərvərliyin və sosial təmasın simvolu” nominasiyası UNESCO-nun Qeyri-maddi Mədəni İrs Siyahısına daxil edilib.
