Bu gün astaralı şəhid Telman Nəhmətov və Lənkərandan olan şəhid Vüqar Heydərovun doğum günüdür.
Azərbaycan Ordusunun kiçik çavuşu Telman Nəhmətov 1990-cı ildə aprelin 29-u Astaranın Alaşa kəndində anadan olub. Vətən müharibəsi zamanı Füzulinin və Xocavəndin azadlığı uğrunda gedən döyüşlərdə savaşıb. O, oktyabrın 31-də Füzuli rayonu istiqamətində gedən hərbi əməliyyatlar zamanı şəhid olub. Astara rayonunun Alaşa kəndində dəfn olunub.
Ölümündən sonra “Vətən uğrunda”, “Füzulinin azad olunmasına görə” və “İgidliyə görə” medalları ilə təltif olunub.
Vüqar Heydərov 1988-ci il aprelin 29-u Lənkəran rayonunun Boladi kəndində ziyalı ailəsində anadan olub.
2002-ci ildə Cəmşid Naxçıvanski adına hərbi liseyə qəbul olub. 2005-ci ildə hərbi liseyi bitirib və həmin ildə Heydər Əliyev adına Ali Hərbi məktəbə qəbul olunub. 2009-cu ildə bu təhsil ocağını bitirdikdən sonra 1 il təlim-tədris mərkəzində hərbi xidmət keçib. 2010-cu il iyulun 22-dən şəhadətə yüksəldiyi anadək Naxçıvan Muxtar Respublikasında yerləşən müxtəlif hərbi hissələrdə zabit olaraq xidmət edib.
Mayor Vüqar Heydərov 2023-cü il sentyabrın 20-si tarixində Antiterror əməliyyatı zamanı döyüş tapşırığını yerinə yetirərkən şəhidlik zirvəsinə ucalıb. O, 21 sentyabr tarixində Boladi kənd qəbiristanlığında dəfn edilib.
Ailəli idi. Vətənə 2 oğul övladı – Yüsif və Mehdi əmanət qalıblar.
