Bakıda sosial şəbəkədə yaranan mübahisə ağır cinayətlə nəticələnib. Hadisənin “baş qəhrəmanı” Masallı rayon sakini, Vətən müharibəsi qazisi Elvin (red. sadalanacaq adlar şərtidir) olub.
Modern.az məlumat verir ki, Elvin “TikTok”da yazılan bir şərh üstündə əvvəllər tanımadığı Rauf ilə mübahisə edib. Məsələyə aydınlıq gətirmək üçün o, Raufla əlaqə saxlayaraq görüş təyin edib.
2025-ci il aprelin 28-də axşam saatlarında Biləcəri qəsəbəsində görüşən gənclər əvvəlcə söhbət ediblər və birlikdə Raufun evinə gediblər. Qısa danışıqdan sonra Elvin ərazidən uzaqlaşıb, lakin gecə saat 01:00 radələrində yenidən həmin evə qayıdıb. O, evə icazəsiz daxil olaraq çantasında olan bıçaqla Raufa çoxsaylı zərbələr endirib.
Ağır yaralanan Rauf hadisədən sağ çıxıb. Elvin isə dərhal “102” xidmətinə zəng edərək polisə könüllü şəkildə təslim olub.
Bakı Ağır Cinayətlər Məhkəməsinin hökmünə əsasən, Elvin qəsdən adam öldürməyə cəhd və mənzil toxunulmazlığını pozmaqda təqsirli bilinib və 11 il 3 ay müddətinə azadlıqdan məhrum edilib.
