Ümummilli Lider Heydər Əliyevin anadan olmasının 102-ci ildönümü münasibətilə Lənkəran, Astara, Cəlilabad və Masallı rayonlarında körpələr evi–uşaq bağçaları istifadəyə verilib.
AZƏRTAC xəbər verir ki, Lənkəran-Astara Regional Təhsil İdarəsinin tabeliyində olan Lənkəran şəhər 3 və 7 nömrəli, Astara şəhər 3 nömrəli, Təngərüd, Şiyəkəran və Şahağac kənd körpələr evi-uşaq bağçaları, Cəlilabadda şəhər 1 nömrəli körpələr evi-uşaq bağçası, Masallı şəhər 4 nömrəli, Qızılağac kənd uşaq bağçası təmirdən sonra istifadəyə verilib, Ərkivan qəsəbə 2 nömrəli körpələr evi-uşaq bağçası isə yeni fəaliyyətə başlayıb.
Bağçaların istifadəyə verilməsi münasibətilə təşkil olunan açılış mərasimlərində rayon icra hakimiyyətlərinin başçıları, Lənkəran-Astara Regional Təhsil İdarəsinin rəhbərliyi, eləcə də yerli ictimaiyyətin nümayəndələri iştirak ediblər.
Yenilənmiş bağçalar uşaqları müasir və rahat təhsil mühiti ilə təmin edir, bundan əlavə yeni iş yerlərinin açılmasına da imkan yaradır. Yeni məktəbəqədər təhsil müəssisələrində 688 uşağın təlim-tərbiyəsi ilə 106 nəfərdən ibarət pedaqoji heyət məşğul olacaq. Növbəti tədris ili üçün 43 ümumtəhsil məktəbində və 21 məktəbəqədər təhsil müəssisəsində cari təmir işlərinin aparılması planlaşdırılır.
