Bu gün Vətən uğrunda canından keçən “Canavar” ləqəbli Rəşad Abdullayevin anadan olduğu tarixdir.
1941-1945-ci illər Böyük Vətən müharibəsinin qəhrəmanı olan babası Məmmədağa Abdullayevin "aslanım" dediyi nəvəsi – Rəşad Arif oğlu Abdullayev 1988-ci il sentyabrın 14-də Cəlilabad rayonunun Göytəpə şəhərində anadan olub.
Aprel döyüşləri zamanı Rəşad Abdullayev "N" saylı hərbi hissənin komandir müavini kimi döyüşlərdə yaxından savaşıb. Belə ki, o, döyüş başlayandan bitənə qədər mühasirədə olsa belə, mühasirədən çıxmağı bacarmış, Ermənistan ordusunun zabit-əsgər heyətini məhv edib.
O, 2016-cı ildə "Hərbi xidmətlərə görə" medalı ilə təltif edilib.
2014, 2015, 2017 və 2019-cu illərdə xarici ölkələrdə XTQ kurslarının, o cümlədən Türkiyədə keçirilən “TurAZ Qartalı” paraşut təlimlərinin iştirakçısı olaraq fərqlənmə ilə bitirib.
Vətən müharibəsi zamanı o, öz hərbi dəstəsi ilə Murov dağında ilk ayaq basanlardan olub. Ən öndə gedərək 34 erməni postunu ələ keçirib və Murov yüksəkliyinə Azərbaycan bayrağını sancıb. Düşmənlə üzbəüz döyüşərkən sinəsindən yaralanmasına baxmayaraq, 20 saat ərzində zabit yoldaşlarını tək qoymayıb. Yaralı vəziyyətdə ayağa qalxaraq irəli getmələrini əmr edib. O, Ağdərə və Kəlbəcər istiqamətində aparılan əməliyyatların iştirakçısı olub. 2020-ci ilin sentyabrın 29-da Murov yüksəkliyində qəhrəmancasına döyüşərək şəhadətə qovuşub.
Rəşad Abdullayevə ölümündən sonra "Vətən Müharibəsi Qəhrəmanı" adı verilib.
Ölümündən sonra "Vətən uğrunda", "Kəlbəcərin azad olunmasına görə" və "Xocavəndin azad olunmasına görə" medalları ilə təltif edilib.
