Ali Məhkəmədə Cəlilabad rayon sakini Yenigül Rəhimovanı qətlə yetirməkdə təqsirləndirilən Seymur Məmmədov və Nurlan Bağırov barəsindəki kassasiya şikayətinə baxılıb.
Məlumata görə, hakim İlkin Rəcəbovun sədrliyi ilə keçirilən iclasda şikayət geri götürülüb.
Xatırladaq ki, 2024-cü ilin yanvarında Abşeronun Fatmayı kəndi ərazisində, yol kənarında zorakılıq əlamətləri olan qadın meyiti tapılmışdı. Araşdırmalar nəticəsində meyitin Cəlilabad sakini Yenigül Rəhimovaya məxsus olduğu müəyyən edilmişdi.
İstintaq zamanı məlum olub ki, Seymur Məmmədov və Nurlan Bağırov hadisə günü qadınla kafedə görüşüblər. Şəxsi mübahisə zəminində onu avtomobildə qətlə yetirərək, meyiti Fatmayı kəndi yaxınlığında yol kənarına atıblar.
Hər iki şəxs əvvəllər məhkumluq həyatı yaşamış, cəzaçəkmə müəssisəsində tanış olmuşdular. Nurlan Bağırov hadisədən sonra ölkədən qaçsa da, İnterpol xətti ilə Gürcüstanda saxlanılaraq Azərbaycana gətirilib.
Məhkəmənin hökmü ilə onların hər biri 18 il azadlıqdan məhrum edilib, daha sonra Bağırovun cəzası 17 il 10 aya endirilib.
Beləliklə, Ali Məhkəmənin qərarı ilə iş üzrə məhkəmə araşdırmaları yekunlaşdırılıb.
