Cəlilabad rayonunun Uzuntəpə kənd sakinləri elektrik enerjisinin acınacaqlı vəziyyətindən narazıdırlar.
Sakinlərin Cenublu.az-a verdiyi məlumata görə, kəndə verilən enerjinin gərginliyi son vaxtlar 150 volta qədər düşür, bu isə məişət avadanlıqlarının sıradan çıxmasına səbəb olur.
Məsələnin səbəbi kimi, sərhəd kəndi olan Maşlıq kəndinə elektrik enerjisinin Uzuntəpə kəndinin işıq xəttindən verilməsi göstərilir. İddia olunur ki, Maşlıq kəndi əsasən əkinçiliklə məşğuldur və orada suvarma üçün lazım olan elektrik Uzuntəpənin transformatoru vasitəsilə ötürülür. Bu isə artıq yüklənməyə səbəb olur.
“Transformator bu qədər yükə tab gətirmir. Kondisionerlər işləmir, avadanlıqlar sıradan çıxır. Şəxsən mənim kondisionerim yanıb. İşıq pulu ödəyirik, amma normal işıq almırıq,” – deyə sakinlərdən biri deyib.
Kənd əhalisi Cəlilabad Rayon İşıq İdarəsindən transformatorun dəyişdirilməsini və problemin dərhal həllini tələb edir.
View this post on Instagram
