Cəlilabad rayonunun Suluçeşmə kənd sakini Mehman Hüseynov artıq bir aydır elektrik problemi ilə üz-üzə qaldığını bildirir. Onun Cenublu.az-a verildiyi məlumata görə, məsələ ilə bağlı dəfələrlə "Azərişıq" ASC Cəlilabad rayon idarəsinə müraciət etsə də, heç bir nəticə əldə edilməyib.
Vətəndaş bildirir ki, evinə yeni sayğac quraşdırıldıqdan sonra gün ərzində 20-25 dəfə elektrik enerjisi kəsilir. Bu səbəbdən soyuducudakı ərzaqlar xarab olub, su nasosundan və internetdən istifadə mümkün deyil.
“Gedib-gəlməkdən yorulmuşam. Boş və yalançı vədlər verərək məni yola salırlar. İşıq idarəsinin müdirinə, baş mühəndisinə, satış şöbəsinin rəisinə və hətta bizim bildirişləri verən nəzarətçiyə problemi çatdırmışam. 199 Çağrı Mərkəzinə də dəfələrlə şikayət etmişəm, amma nəticə yoxdur,” – deyə M.Hüseynov bildirir.
Sakin səlahiyyətli qurumlardan problemi yerində araşdırmağı və uzun müddətdir davam edən bu vəziyyəti köklü şəkildə həll etməyi tələb edir.
