Bu gün Astaradan olan şəhid Nurlan Əhliman oğlu Fərəməzovun anım günüdür.
Nurlan Fərəməzov 1992-ci il, mayın 1-də Astara rayonunun Təngərüd kəndində anadan olub.
Orta təhsilini Təngərüd kənd tam orta məktəbində bitirib. 2009–2015-ci illərdə Azərbaycan Dövlət Tibb Universitetinin Hərbi tibb fakültəsində təhsil alıb. Gədəbəy rayonunda məntəqə tibb xidməti rəisi vəzifəsində işləyib. Daha sonra Tovuzda xidmətinə davam edib. 6 il hərbi həkim kimi çalışıb.
Azərbaycan Ordusunun tibb xidməti baş leytenantı və hərbi tibb qulluqçusu Nurlan Fərəməzov 2020-ci il sentyabrın 27-də başlanan Vətən müharibəsində iştirak edib. Oktyabrın 9-da N.Fərəməzov yaralı hərbçiləri savaş meydanından çıxararkən başının arxa tərəfindən ciddi zədə alıb. Buna baxmayaraq, son nəfəsinə qədər meydandan çəkilməyib. Çoxlu qan itirib və elə döyüş meydanında şəhid olub. Şəhidimiz oktyabrın 10-da doğulduğu kənddə dəfn edilib.
Ölümündən sonra “Vətən uğrunda”, “İgidliyə görə”, “Füzulinin azad olunmasına görə”, “Cəbrayılın azad olunmasına görə” medalları ilə təltif olunub.
