Biləsuvar rayonunda iki nəfər arasında yaranan mübahisə cinayətlə nəticələnib.
Cenublu.az xəbər verir ki, hadisə bu il yanvarın 15-də baş verib. 1982-ci il təvəllüdlü Elnur həmin gün Eldar ilə şəxsi münasibətlər zəminində mübahisə edib və onun sifətinə zərbə vuraraq müxtəlif dərəcəli bədən xəsarətləri yetirib.
Elnurun barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb. O, ifadəsində bildirib ki, Biləsuvar Mənzil Kommunal Təsərrüfatı İdarəsində işləyir və hadisə vaxtı Eldarın evinin qarşısında təmizlik işləri görürdü. Elnurun sözlərinə görə, Eldarın həyətinin qarşısına torpaq tökməsi işini çətinləşdirdiyi üçün ona irad bildirib, mübahisə yaranıb və sonda bir dəfə şillə ilə onu vurub.
Zərərçəkmiş Eldar isə bildirib ki, Elnur həyətdə yüksək səslə adını çağırdıqda ona irad bildirib. O, zibili ayrılmış yerə atdığını deyib, lakin Elnur ondan onu yığışdırmağı tələb edib. Mübahisə böyüyüb və Elnur onu yumruqla vurub. Qardaşı və Elnurun atası hadisəyə müdaxilə edərək tərəfləri ayırıblar.
Biləsuvar Rayon Məhkəməsi Elnuru təqsirli bilərək 6 ay azadlığın məhdudlaşdırılması cəzası verib. Bu müddətdə onun saat 23:00-dan 07:00-dək evdən çıxması və rayon ərazisini tərk etməsi qadağan olunub, həmçinin elektron nəzarət altında saxlanması qərara alınıb.
