Biləsuvarda həmyerlisini qətlə yetirməkdə təqsirləndirilən 1995-ci il təvəllüdlü Semur Məmmədquliyevin məhkəmə işi yekunlaşıb.
Teleqraf.аz xəbər verir ki, Şirvan Apellyasiya Məhkəməsində hakim Cavid Sultanovun sədrliyi ilə keçirilən prosesdə prokurorun protesti təmin edilib və S. Məmmədquliyevin cəzası 14 il 6 aydan 16 ilə qaldırılıb. Təqsirləndirilən şəxsin və vəkilinin şikayətləri isə rədd edilib.
Qətl hadisəsi 27 oktyabr 2024-cü ildə Biləsuvar rayonunda məcburi köçkün qəsəbəsində baş verib. Cəbrayıl sakini S.Məmmədquliyev Şahin Şahverdiyevlə aralarında ailə məsələsi ilə bağlı yaranmış mübahisə səbəbindən onu döyərək öldürüb. İttihama görə, Ş.Şahverdiyev təqsirləndirilənin bacısına elçi gedib, rədd cavabı aldıqdan sonra ailə üzvlərini təhqir edib.
S.Məmmədquliyev Cinayət Məcəlləsinin 120.2.4-cü (xüsusi amansızlıqla adam öldürmə) maddəsi ilə məsuliyyətə cəlb olunub.
