Bu gün Azərbaycanın Milli Qəhrəmanı Soltanağa Bayramovun doğum günüdür.
Soltanağa Nəhmət oğlu Bayramov 1936-cı il sentyabrın 17-də Lənkəran rayonunun Şürük kəndində anadan olub.
O, orta təhsilini Astara rayonunda alıb. 1957-ci ildə Lənkəran Tibb Məktəbini bitirib və təyinatla Lənkəran hərbi hospitalında işləməyə başlayıb. 1967-ci ildən fizioterapevt, daha sonra isə rentgenoloq-texnik vəzifələrində çalışıb. Soltanağa Bayramov hospitalda işlədiyi müddətdə “Səhiyyə əlaçısı” adına layiq görülüb.
O, Milli Ordunun çoxsaylı əsgərlərini müalicə edərək həyata qaytarıb. 1990-cı illərin əvvəllərində “Talış-Muğan Respublikası” yaratmaq məqsədi ilə Əlikram Hümbətovun başçılıq etdiyi silahlı dəstə cənub bölgəsində ağır cinayətlər törədirdi. 1993-cü il avqustun 23-də həmin silahlılar hərbi hospitala hücum edərkən Soltanağa Bayramov onlara müqavimət göstərib. O, ağır yaralanaraq xəstəxanada vəfat edib.
Soltanağa Bayramov Lənkəran şəhərinin Şəhidlər xiyabanında dəfn olunub.
O, ölümündən sonra — 1993-cü il avqustun 24-də “Azərbaycan Respublikasının Milli Qəhrəmanı” adına layiq görülüb. Lənkəran şəhərindəki küçələrdən biri onun adını daşıyır, şəhərdə büstü ucaldılıb. Həmçinin Soltanağa Bayramovun yaşadığı binanın önünə xatirə lövhəsi vurulub.
