Bəzi bölgələrdə mal-qara arasında dabaq xəstəliyinin yayılması ilə bağlı iddialar dolaşır. Hətta bu səbəbdən bəzi insanlar ət almaqdan ehtiyat edirlər.
Bəs görəsən, deyilənlər doğrudurmu? Xəstəliyin yayılmasının qarşısını almaq üçün hansı tədbirlər görülür?
Aqrar Xidmətlər Agentliyindən lent.az-ın sorğusuna cavab olaraq bildirilib ki, epizootik plana uyğun şəkildə Heyvan Sağlamlığı və Baytarlıq Xidmətləri Mərkəzi tərəfindən ölkə üzrə iribuynuzlu heyvanlar arasında müxtəlif xəstəliklərə, o cümlədən dabaq xəstəliyinə qarşı peyvəndləmə aparılır.
Həmçinin qeyd olunub ki, heyvanların kütləvi tələfatı ilə bağlı Xidmətə hər hansı müraciət daxil olmayıb.
Qeyd edək ki, dabaq xəstəliyi cütdırnaqlı ev və vəhşi heyvanların iti kontagioz (yüksək yoluxucu) virus xəstəliyidir. Xəstəliyin əsas əlamətləri yemdən imtina, gövşəmənin pozulması və ya tam dayanması, ağızdan selik axmasının artması, yüksək hərarət, dırnaq və yelində yaraların yaranması, ağızda, dodaqlarda və burun ətrafında qabarcıqların əmələ gəlməsi, tənəffüs və həzm yollarının selikli qişasının iltihabı, tənəffüs və udma aktının pozulması, həmçinin ürək çatışmazlığının yaranması ilə müşahidə olunur.
