Bu gün Azərbaycan Silahlı Qüvvələrinin yaranmasının 107 ili tamam olur.
26 iyun 1918-ci ildə Azərbaycan Xalq Cümhuriyyəti Nazirlər Şurasının qərarına əsasən, ilk hərbi hissə olan Azərbaycan korpusu yaradılıb. 28 may 1918-ci ildə qəbul olunmuş “İstiqlal bəyannaməsi”ndə Azərbaycanın özünü xarici müdaxilələrdən müdafiə etmək, daxili düşmən qüvvələri zərərsizləşdirmək üçün orduya malik olması, özünün silahlı qüvvələrini yaratmalı olması qeyd edilib. Bundan əlavə, Azərbaycan Xalq Cümhuriyyəti 25 min nəfərlik ordu yaratmaq məqsədini irəli sürmüşdü.
1 avqust 1918-ci ildə Azərbaycanın Hərb Nazirliyi təsis edilib. İlk müdafiə naziri Xosrov bəy Sultanov olub. Daha sonra isə Səmədbəy Mehmandarov bu vəzifəyə təyin edilib.
Milli Ordu yaranandan sonra Osmanlı dövlətinin Qafqaz İslam Ordusu ilə birlikdə Bakını və ətraf qəzaları erməni-bolşevik işğalından azad edib. 1920-ci ilin aprel ayında Azərbaycan bolşevik Rusiyası tərəfindən işğal edildiyinə görə hərbi nazirlik ləğv olunub.
9 oktyabr 1991-ci ildə Azərbaycan Ali Soveti tərəfindən Milli ordunun yaradılması barədə qərar qəbul edilib. Bu qanuna əsasən, 9 Oktyabr Azərbaycan Respublikası Silahlı Qüvvələri günü elan olunub. Azərbaycan Respublikası Prezidentinin 22 may 1998-ci il tarixli qərarına görə, həmin Fərman qüvvədən düşürülmüş və 26 İyun Azərbaycan Respublikası Silahlı Qüvvələri günü elan edilib.
