Bu gün Astaradan olan şəhid Rameş Zəkiyevin dünyaya göz açdığı gündür.
Rameş Gülverdi oğlu Zəkiyev 2001-ci ildə Astaranın Şahağac kəndində doğulub. O, boks üzrə bir çox yarışlarda iştirakına görə Fəxri fərmanlara və medallara layiq görülüb. 2016-cı ildə ölkəmizi Rusiyada təmsil edib.
Orta məktəbi bitirdikdən sonra 2019-cu ildə hərbi xidmətə yollanıb. Həqiqi hərbi xidmət müddətində Ağdam rayonunun Baharlı kəndində xidmət edib.
Vətən müharibəsində minaatan olaraq iştirak edən Rameş Ağdam istiqamətində gedən döyüşlərdə şücaət göstərib. 15 oktyabr 2020-ci ildə Ağdam rayonunun Hacıməmmədli kəndində minaatan mərmisinin düşməsi nəticəsində 2 döyüşçü yoldaşı ilə birgə şəhidlik zirvəsinə ucalıb. Onun cənazəsi 20 oktyabr 2020-ci ildə Şahağac kəndinə gətirilib və torpağa tapşırılıb.
Ölümündən sonra “Vətən uğrunda” və “Ağdamın azad olunmasına görə” medalları ilə təltif edilib.
