Astara rayonunun çəltik sahələrində biçin uğurla davam edir.
AZƏRTAC xəbər verir ki, Astara çəltikçiləri bu il ötən ilkindən 60 hektar çox, yəni 300 hektar sahədə çəltik əkiblər. Havaların mülayim keçməsi və düzgün aqrotexniki qulluq sayəsində bol məhsul yetişdirilib. Hazırda sahələrdə məhsul yığımı davam edir. Ekoloji təmiz, təbii Astara düyüsü əsasən rayonun Artupa, Səncərədi, Suparibağ, Kakalos, Ərçivan, Pensər, Şiyəkəran kəndlərində yetişdirilir. Təkcə Artupa kəndində bu il 80 hektara yaxın çəltik əkilib.
Fermer Əlibaba Əliyev builki məhsuldarlıqdan razıdır: “80 sotluq yer əkmişəm, 3 ton yarıma yaxın məhsul götürmüşəm. Məhsuldarlıq demək olar yaxşıdır. Havamız da gözəldir, su da kifayət qədər oldu”.
Astarada daha çox yerli iqlimə uyğun “Haşimi”, “Apola”, “Gülanə”, “Meko” və “Sədri” toxum növləri əkilir. Artupa kəndinin torpaq payçıları dadı, ətri ilə tanınan “Haşimi” sortuna üstünlük verirlər. Rayonda çəltik biçiminə 7 çəltikbiçən müasir texnika cəlb olunub. Növlərinə görə məhsul 10-15 gün zaman fərqi ilə yetişdiyindən kombaynla bağlı çətinlik yaşanmır.
“1998-ci ildən bəri Astaranın rayonunda çəltikçilik ilk dəfə bizim Artupa kəndində olub. Biz də dədə-babamızın adət-ənənəsini bu günə kimi davam etdiririk. Şükür Allaha məhsuldarlığımız ötən ilə nisbətən yaxşıdır. Ötən il 4 ton, bu il isə 4,2, hətta 4,5 ton də məhsul götürən olub. Biçin yavaş-yavaş başa çatır. Əvvəllər çox çətin idi. Əllə biçərdik, növbəyə qalardıq. Şükürlər olsun ki, yaxın illərdə minikombaynlar çıxıb. Bununla bizim həm məhsul itkiyə getmir, həm də çəltik doğranmır. Dəyirmanda da itki görmürük, keyfiyyət də yüksəkdir”, - deyə fermer Azər Əliyev vurğulayıb.
Biçilən çəltik dəyirmanlarda emal edilir. Əvvəllər çəltiyi başqa ərazilərə aparan Artupa sakinləri artıq uzağa getmədən elə öz kəndlərində düyüyə çevirirlər. Hətta qonşu kəndlərdən də buraya gələnlər olur. Dəyirmanda çəltik müasir qurutma sistemi vasitəsilə əvvəlcə qurudulur, sonra isə üyüdülür. Üyüdülən çəltiyin 65 faizindən düyü əldə edilir. Bunun da 60 faizi xalis məhsul, 5 faizi isə düyü xırdası olur. Son illər fermerlər qara düyü sortu da istehsal edirlər. Bu sort əsasən diabetli xəstələr üçün faydalı sayılır.
Qeyd edək ki, bu günədək Astarada 45 hektar sahədə biçim başa çatıb. 200 tona yaxın çəltik yığılıb. Yığım sentyabrın ortalarınadək davam edəcək.
