Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi ölkəmizdə üçüncü dəfə “Peşələr Festivalı”nı təşkil edir.
“Peşə öyrən, gələcəyini qur!” devizi ilə baş tutacaq festivalın əsas məqsədi gənclərdə düzgün peşə seçimi barədə məlumatlılığı artırmaq və iştirakçılara müxtəlif peşələr haqqında əyani təsəvvür yaratmaqdır.
Festival sentyabrın 17-də Astara rayonunda start götürəcək və ölkənin 11 şəhər və rayonunu əhatə edəcək. Astara sakinləri festivalda 14 fərqli peşə üzrə maarifləndirici tədbirlərdə iştirak edə biləcəklər. Bu peşələr arasında kibertəhlükəsizlik, data analitika, 3D animator, turizm təşkilatçısı, dülgər, qənnadçı, xilasedici, barista və baytar kimi sahələr yer alır.
İştirakçılar peşə sahələri üzrə tələb olunan bacarıqlar, ixtisas seçimi və peşəkarlarla ünsiyyət imkanları haqqında faydalı məlumatlar əldə edəcəklər. Festival çərçivəsində ekspertlər tərəfindən təqdimatlar və vorkşoplar da təşkil olunacaq.
Qeyd edək ki, festivalda iştirak ödənişsizdir.
Sentyabrın 19-da isə tədbir Biləsuvar rayonunda davam edəcək.
