Astara rayonunda 40 yaşlı Nicat Sadıqovun anası ilə mübahisəsi cinayətlə nəticələnib. Hadisə birlikdə yaşadıqları evdə baş verib. Spirtli içki aludəçisi olan Nicat sərxoş halda evə gəlib və anası Zəminə onun spirtli içki içməsinə irad bildirib. Mübahisə zamanı Nicat anasının bədəninə yumruq və şillə ilə zərbələr vuraraq ona müxtəlif dərəcəli xəsarətlər yetirib.
Nicat barəsində Cinayət Məcəlləsinin 128-ci maddəsi ilə ittiham elan edilib və o, ifadəsində özünü təqsirli bilib. Bildirib ki, iki azyaşlı övladı var, hadisəni içkinin təsiri altında törədib və anası ilə barışıb.
Zərərçəkmiş Zəminə isə deyib ki, oğlu iki həftə əvvəl ailəsindən ayrılaraq onun evinə qayıdıb, içki aludəçisidir və hadisə günü ondan pul istədikdən sonra onu döyüb. Bu səbəbdən polisə müraciət edib.
Astara Rayon Məhkəməsinin hökmü ilə Nicat Sadıqov aylıq gəlirinin 20 faizi tutulmaqla 1 il islah işləri cəzasına məhkum edilib.
