Astara Gömrük İdarəsinin əməkdaşları böyük miqdarda narkotik vasitənin ölkə ərazisindən tranzit keçirməyə cəhdin qarşısını alıblar.
Cenublu.az Dövlət Gömrük Komitəsinə (DGK) istinadən xəbər verir ki, İrandan Rusiyaya tərəvəz – brokoli və kahı daşıyan yük maşını "Cənub-Astara" gömrük postunda yoxlanılıb. Rentgen cihazı vasitəsilə aparılan baxış zamanı şübhəli cizgilər aşkarlanıb. Ətraflı yoxlama zamanı xidməti it paletlərdən birindəki 32 qutuya reaksiya verib.
Həmin qutulardan 118 kiloqram 444 qram çəkidə, folqaya bükülmüş şəkildə qurudulmuş marixuana tapılıb. Narkotik vasitələr qablaşdırmanın içində gizlədilərək gömrük nəzarətindən yayındırılmağa çalışılıb.
Faktla bağlı araşdırma aparılır.
