Daxili İşlər Nazirliyinin Baş Narkotiklərlə Mübarizə İdarəsinin əməkdaşları tərəfindən həyata keçirilən növbəti əməliyyat zamanı qaçaqmalçılıq yolu ilə ölkəyə külli miqdarda narkotik vasitə gətirərək satmaq istəyən şəxslərin fəaliyyəti ifşa edilib.
Cenublu.az xəbər verir ki, Astara rayonunda keçirilən tədbir zamanı 1977-ci il təvəllüdlü, əvvəllər də narkotik vasitələrin satışı ilə əlaqədar məhkum olunmuş Elçin Cavadov saxlanılıb. Ondan ümumilikdə 55 kiloqram tərkibinə zərərli maddələr əlavə edilmiş marixuana, metamfetamin və tiryək aşkarlanıb.
Araşdırma zamanı E.Cavadovun ölkəyə qaçaqmalçılıq yolu ilə narkotik vasitələri keçirən əsas şəxslərdən biri olduğu müəyyən edilib. Faktla bağlı cinayət işi başlanılıb və saxlanılan şəxs barəsində məhkəmənin qərarı ilə həbs qətimkan tədbiri seçilib.
Polis əməkdaşları tərəfindən narkotik vasitələrin qanunsuz dövriyyəsinə qarşı mübarizə fasiləsiz davam etdirilir.
