Bu gün astaralı həkim, millət vəkili Rəşad Mahmudovun doğum günüdür. Bu haqda məlumatı Cenublu.az verir.
Rəşad Mahmudov 18 yanvar 1974-cü ildə Astara rayonunda anadan olub. Rayonun Səməd Vurğun adına orta məktəbini bitirib. Ali təhsilini 9 Eylül Universitetinin tibb fakültəsində alıb. Daha sonra Ege Universitetinin ürək-damar cərrahiyəsi Elmi Mərkəzinin doktoranturasında oxuyub və Uzmanlıq Diplomunu müdafiə edib.
2006-cı ildə namizədlik, 2015-ci ildə isə doktorluq dissertasiyasını müdafiə edərək tibb üzrə elmlər doktoru alimlik dərəcəsini alıb.
Əmək fəaliyyətinə Ege Universitetində ürək-damar cərrahı kimi başlayıb. Daha sonra Kent xəstəxanasında, Mərkəzi Neftçilər Xəstəxanasında ürək-damar cərrahı, Respublika Müalicəvi Diaqnostika Mərkəzində isə elmi tədqiqat işləri üzrə direktor müavini vəzifəsində işləyib.
2018-ci ildən Mərkəzi Gömrük Hospitalında DGKi Tibbi Xidmət İdarəsinin Elmi-Təcrübi və Tədris Mərkəzinin rəisi vəzifəsində işləyir.
O, Azərbaycanda və dünyanın müxtəlif ölkələrində 40-dan çox beynəlxalq, regional konfransların təşkilinə rəhbərlik edib və 35-dən çox elmi məqalələrin tərtibatçısı olub. Türkiyədə nəşr olunan "Aort Cərrahiyəsi" və İtaliyada çap olunan "Trikuspid Qapaq Cərrahiyyəsi" kitablarının həmmüəllifidir.
AR Prezidenti İlham Əliyev tərəfindən "Tərəqqi medalı", "Azərbaycan Xalq Cümhuriyyətinin 100 illiyi" medalları və "Əməkdar həkim" fəxri adı alıb.
Heydər Əliyev Fondunun prezidenti Mehriban Əliyeva tərəfindən "Qızıl çinar" beynəlxalq mükafatı ilə təltif olunub.
