Lerikdə qadınlar arasında baş verən dava qalmaqala çevrilib. Rayonun kəndlərindən birində yaşayan Cəmilə Həsənova polisə müraciət edərək baldızı Rahibə Mələkovanın onu döydüyünü bildirib.
Hadisə baldızın gəlinini həmkəndlisi Elvin Ağəlizadə ilə bir yerdə görməsi ilə başlayıb. Qardaşına xəyanət etdiyini iddia edən Rahibə Cəmiləyə hücum edib. Gəlin isə hadisə zamanı Elvinlə eyni iş yerində — xadimə və gözətçi kimi çalışdıqlarını deyib.
Maraqlıdır ki, baldızın “xəyanətkar” adlandırdığı həmin Elvin Ağəlizadə bir neçə il öncə həyat yoldaşının müəmmalı ölümü ilə gündəmə gəlmişdi. 2022-ci ilin aprelində 22 yaşlı Elnarə Ağəlizadə ağır vəziyyətdə xəstəxanaya çatdırılmış, 10 gün sonra dünyasını dəyişmişdi.
O zaman mərhumun yaxınları Elnarənin Elvin və onun anası tərəfindən döyüldüyünü iddia etmiş, məsələ hətta televiziya verilişlərində də müzakirə olunmuşdu. Rəsmi versiyaya görə, hadisə intihar kimi qeydə alınıb.
Lerikdəki son hadisə isə həmin ailə ətrafında yeni söz-söhbətlərə səbəb olub.
Qeyd edək ki, adlar şərtidir.
