Cəlilabad rayon sakini, 1957-ci il təvəllüdlü Fərman arvadını qucaqlayan həmkəndlisi Aqili öldürməyə cəhd edib. Hadisə ötən ilin noyabrında baş verib.
Teleqraf.az-ın məlumatına görə, Fərman 2024-cü ilin sentyabrında məktəbdə arvadı Naziləni Aqilin qucaqlayıb öpdüyünü görüb. Qısqanclıq və hiddət hissi onu uzun müddət rahat buraxmayıb. Arvadı bir müddət ata evində qaldıqdan sonra geri qayıdanda, Fərman yenidən Aqilin hərəkətlərini xatırlayıb və qisas almağa qərar verib.
Noyabrın 24-də axşam saatlarında həyətdən balta götürərək Aqilin evinə gedib. Aqilə zərbə endirmək istədiyi vaxt onun arvadı Fatimə müdaxilə edərək müqavimət göstərib. Nəticədə qadın xəsarət alıb. Daha sonra Fərman Aqilin başına zərbə vuraraq hadisə yerindən qaçıb.
Məhkəmədə Fərman qəsdən öldürmək niyyəti olmadığını desə də, istintaq onun qisas məqsədilə hərəkət etdiyini sübuta yetirib.
Lənkəran Ağır Cinayətlər Məhkəməsinin hökmü ilə Fərman 11 il 3 ay müddətinə azadlıqdan məhrum edilib. Apellyasiya Məhkəməsi şikayətini təmin etməyib.
