Kikboksinq və Muay-Tay üzrə 9 qat Dünya çempionu Araz Musayevin bıçaqlanması ilə bağlı bəzi detallar məlum olub.
Musavat.com xəbər verir ki, Araz Musayevə edilən hücumda 4 nəfər iştirak edib, onlardan biri Rusiyaya qaçıb.
Onlardan ikisi, Azərbaycan vətəndaşları Antalya hava limanında saxlanılıb. Üçüncü şübhəli Rusiyaya qaçmağı bacarıb, dördüncü şəxs isə hələ də axtarışdadır. Onun axtarışı davam edir.
Şübhəlilərin Türkiyəyə giriş tarixləri və onların icarəyə götürdüyü avtomobillər araşdırılıb. Polis bu qənaətə gəlib ki, dörd nəfərdən ibarət qrup əvvəlcədən planlaşdırılmış və qəsdən adam öldürmək məqsədilə hücumu həyata keçirmək üçün Türkiyəyə gəlib.
Polis əməkdaşları müəyyən ediblər ki, Araz Musayevi bıçaqlayan iki şübhəli hadisə yerindən taksi ilə uzaqlaşıb.
Xatırladaq ki, hadisə İFMA üzrə dünya çempionatının keçirildiyi Antalyada baş verib. Turnirdə Azərbaycandan 14 idmançı iştirak edir və nümayəndə heyətinə Araz Musayevin özü rəhbərlik edir.
Qeyd edək ki, Araz Furqan oğlu Musayev 1977-ci il Masallı rayonunun Lürən kəndində anadan olub. Ailəlidir.
