Bu gün Vətən müharibəsi şəhidimiz – Əbülfəz Rəhmətovun doğum gündür.
Əbülfəz Hüseynverdi oğlu Rəhmətov 1989-cu il iyulun 3-də Lerik rayonunun Ambu kəndində anadan olub.
Hərbi xidmət müddətində kapitan Əbülfəz Rəhmətov Aprel döyüşlərində iştirak etmişdi. Həmçinin 2020-ci ilin Tovuz döyüşlərində general-mayor Polad Həşimov ilə bir sırada savaşmışdı.
Əbülfəz Rəhmətov Vətən müharibəsində kəşfiyyatçı və motoatıcı taborun qərargah rəisi kimi iştirak etmişdi. Cəbrayılın və Qubadlının azadlığı uğrunda gedən döyüşlərdə vuruşmuşdu. 16 oktyabr 2020-ci ildə Cəbrayıl istiqamətində döyüş tapşırığının yerinə yetirilməsi zamanı qəhrəmancasına şəhid olmuşdu. Onun nəşi uzun müddətdən sonra – 2021-ci il mayın 6-da Cəbrayıl rayonunda tapılmışdı. May ayının 7-də Lerik rayonunda torpağa tapşırılmışdı.
Ölümündən sonra "Vətən uğrunda", "Cəbrayılın azad olunmasına görə" medalları və "III dərəcəli Rəşadət" ordeni ilə təltif edilib.
