Masallı şəhəri texniki-riyaziyyat təmayüllü "Dəfinə" liseyinin riyaziyyat müəllimi, Əməkdar müəllim, 67 yaşlı Əlinaz Talıbov könüllü olaraq sertifikasiya imtahanında iştirak edərək 56 bal toplayıb.
Sertifikatlaşdırma prosesi ilə bağlı təəssüratlarını "Azərbaycan müəllimi" ilə bölüşən Ə.Talıbov bildirib ki, artıq üçüncü ildir, keçirilən sertifikatlaşdırma təhsilverənlərin peşəkarlıq səviyyələrini, peşə yararlılıqlarını yoxlamaq, təlim ehtiyaclarını öyrənməklə onların peşəkar inkişafına nail olmaq baxımından əvəzolunmazdır.
"İşlədiyim kollektivdə sertifikasiyadan uğurla keçən müəllimlərin yeni yanaşmaları, daha peşəkar münasibətləri, yeni təlim texnologiyalarından böyük səriştə və ustalıqla istifadəsi buna bariz sübutdur. 18 iyun 2025-ci il tarixində könüllü olaraq riyaziyyatdan sertifikasiya imtahanında iştirak etdim. İmtahanın obyektiv və şəffaf təşkili, idarəolunması və nəzarətçilərin mədəni davranışları elə ilk anlardan müsbət aura formalaşdırdı. İmtahanın məzmununa gəlincə isə, pedaqoji prinsiplər tamamilə gözlənilmişdi", - deyə o bildirib.
Əlinaz müəllim onu da qeyd edib ki, son on illərdə təhsil sistemimiz bütövlükdə beynəlxalq təhsil sisteminə inteqrasiya etməklə, dinamik və modern fəaliyyəti ilə gələcək uğurlarımıza nikbinliklə baxmağa əsas verir:
"Bir sözlə, hər cür infrastruktura malik məktəb binalarının, maddi-texniki təminatın, müasir standartlar səviyyəsində tədris vəsaitlərinin pedaqoji prosesin hər bir üzvü üçün əlçatan olması illərlə arzuladığımız modern pedaqoji mühitdə işləməyimizə şərait yaradıb. Təbii ki, bu gün pedaqoji prosesin subyekti kimi, biz müəllimlərin də elmi, pedaqoji biliklərimizin və metodiki ustalıqlarımızın yüksək səviyyədə olması prioritet məsələ kimi hər birimizin qarşısında duran əsas vəzifədir".
