Bu gün Qızılağac Milli Parkının yarandığı gündür. Park, xüsusi mühafizə olunan təbiət ərazilərinin şəbəkəsini genişləndirmək, bioloji müxtəlifliyi qorumaq, təbii resurslardan səmərəli istifadə və ekoturizmi inkişaf etdirmək məqsədilə Azərbaycan Respublikası Prezidentinin 2018-ci il 26 sentyabr tarixli Sərəncamı ilə Lənkəran, Masallı və Neftçala rayonlarının inzibati ərazilərində yaradılıb.
Milli parkın ərazisində su-bataqlıq, yarımsəhra və çəmənlik bitkiləri geniş yayılıb. Burada Xəzər şanagülləsi, ağ suzanbağı, üçyarpaq oxyarpaq, qamış, dəniz lığvəri, ciyən, duzlaq çoğanı, ətirli yovşan, qarağan, gəngiz, şahsevdi və sarıbaş kimi bitki növləri rast gəlinir. Heyvanlar aləmi isə su-bataqlıq quşları, çöl donuzu, canavar, gürzə və digər növlərlə zəngindir.
Azərbaycanın “Qırmızı Kitab”ının III nəşrinə daxil edilən nadir növlərdən flaminqo, ağqaş qaz, adi göydimdik, mərməri ördək, çəhrayı qutan, ərsindimdik, kiçik qu quşu, adi bəzgək, boz durna, qırmızı çalağan və Kür siyənəyi də parkın ərazisində yaşayır.
Qızılağac Milli Parkının ərazisində yerləşən Böyük və Kiçik Qızılağac körfəzləri Ramsar Konvensiyasının siyahısına daxil edilib və beynəlxalq əhəmiyyətli sulu-bataqlıq ərazilər kimi tanınır.
2019-cu ildə park, “Mission Blue” təşkilatının beynəlxalq mühafizə kampaniyası çərçivəsində dünya sularının xilası üçün “ümid yeri” elan olunub.
2023-cü ilin qış sayımı zamanı ölkə üzrə qeydə alınmış 960 mindən çox quşdan 487 minə yaxını Qızılağac Milli Parkının payına düşüb. Bu göstəriciyə görə park ölkədə birinci yeri tutur.
