Bu gün, Masallı rayonu Ərkivan qəsəbəsindən olan əsgər Sənan Mətləb oğlu Seyfullayevin şəhidlik zirvəsinə ucalmasından 1 il ötür. Bu haqda məlumatı 12 yanvar tarixində Cenublu.az verir.
Sənan Seyfullayev 26 sentyabr 1998-ci ildə anadan olub. 2015-ci ildə Cəfər Cabbarlı adına Ərkivan qəsəbə 1 nömrəli tam orta məktəbi bitirib. 2016-2017-ci illərdə müddətli hərbi xidmətdə olub.
Vətən müharibəsinə könüllü yollanan Sənan, Cəbrayıl, Füzuli, Zəngilan, Qubadlı rayonlarının azadlığı uğrunda döyüşüb. O, 30 oktyabr Qubadlı döyüşlərində, "Qanlı Təpə" yüksəkliyini düşməndən azad edərkən şəhid olub. 71 gün itkin kimi axtarılan qəhrəmanımız, 10 yanvar tarixində tapılıb. 12 yanvar 2021-ci ildə doğma Ərkivan qəsəbə qəbiristanlığında torpağa tapşırılıb.
Ölümündən sonra S. Seyfuyllayev "Vətən uğrunda", "Cəbrayılın azad olunmasına görə", "Qubadlının azad olunmasına görə" və "Cəsur döyüşçü" medalları ilə təltif olunub.
