Bu gün Azərbaycanın Milli Qəhrəmanı şəhid Elşad Saday oğlu Əhədovun anım günüdür.
Elşad Saday oğlu Əhədov 1968-ci ildə martın 4-ü Masallı rayonunun Təzə Alvadı kəndində anadan olub. Orta məktəbi burada oxuyub, daha sonra Naxçıvanski adına Hərbi liseyə daxil olub. Sonra Ukraynanın Kamenets-Podolsk Ali komandirlər məktəbinin tələbəsi olub. 1989-cu ildə Volqoqrad hərbi hissələrindən birinə rota komandiri təyin edilib.
Vətənə dönən Elşad əvvəlcə Bakının Güzdək qəsəbəsində, sonra Lənkəran rayonunda rota komandiri kimi fəaliyyət göstərib.
Erməni işğalçılarının hücumu zamanı Füzulidə, Aşağı Veysəllidə, Şişqayada və digər döyüş bölgələrində vuruşub. Son döyüşü Ağdaş yüksəkliyi uğrunda olub. 11 dekabr 1993-cü il Ağdaş yüksəkliyi uğrunda gedən döyüşdə şəhidlik zirvəsinə ucalıb. Ailəli idi, iki övladı yadigar qalıb.
Masallı rayonunun Təzə Alvadı kəndində dəfn olunub.
Ölümündən sonra “Azərbaycan Bayrağı” ordeninə və “Azərbaycanın Milli Qəhrəmanı” adına layiq görülüb.
