Masallıda 2000-ci il təvəllüdlü Sərxan yetkinlik yaşına çatmayan Kəmalə ilə intim münasibətdə olub və sonradan onu aldadaraq pulunu mənimsəməkdə ittiham edilib. Sərxanın ifadəsinə görə, onların tanışlığı mağazada baş verən kiçik bir hadisədən sonra yaranıb. O, Kəmalənin sosial şəbəkədə paylaşdığı depressiv statuslara görə ona yazdığını, hətta qızı narahat edən məktəbli oğlanlarla danışdığını və bəzilərini döydüyünü iddia edib. Sərxanın sözlərinə görə, bu hadisələrdən sonra aralarında sevgi münasibəti yaranıb.
Sərxan deyib ki, Kəmalə ilə cinsi əlaqədə olmayıb, görüşəndə yalnız onu öpüb-qucaqlayıb və ona dərslərində kömək edib. Lakin Kəmalə ifadəsində bir neçə dəfə cinsi əlaqədə olduqlarını bildirib. 2024-cü ildə Sərxan Kəmaləni ağır xəstə olması yalanına inandıraraq iki dəfə – əvvəlcə 5100 dollar, daha sonra 3100 dollar pul alıb və bu pulları mərc oyunlarında uduzub. O, mərc oyunlarına aludə olduğunu, sonra tövbə etdiyini deyib.
İşə Lənkəran Ağır Cinayətlər Məhkəməsində baxılıb. Sərxan 10 il azadlıqdan məhrum edilib və əlavə olaraq 2 il yetkinlik yaşına çatmayanlarla bağlı fəaliyyətlərdən uzaqlaşdırılıb. Müdafiə tərəfi apellyasiya şikayəti versə də, Şirvan Apellyasiya Məhkəməsi cəzanı yalnız qismən yüngülləşdirərək 7 il 6 aya endirib, əlavə qadağanı isə qüvvədə saxlayıb.
